Li Bestayê bi destê cerdevanan darên sedsalî tên birîn!

Parve bike:

ŞIRNEX -  Li devera Çemê Elî ya Herêma Bestayê ev zêdetirî hefteyeke bi pêşengtiya cerdevan Necîm Varol dar tên birîn. 

 
Qirkirina xwezayê ya li navenda Şirnexê û navçeyên wê di bin çavdêriya leşkeran û bi destê cerdevanan tê kirin, didome. Zêdetirî 6 sal in li çiyayên Cûdî, Gabar û Herêma Bestayê bênavber dar tên birîn. Her çend bi awayekî fermî hatibe ragihandin ku birîna daran hatiye sekinandin jî, dîmenên li Bestayê hatine kişandin nîşan didin ku ev qirkirina daran hêj didome. 
 
Di dîmenên li Herêma Çemê Elî hatine kişandin de tê dîtin ku bi sedan dar hatine birîn. Hat zanîn ku ev dar ji hêla cerdevanê bi navê Necîm Varol ê ji gundê Hosyanê yê navçeya Berwarî ya Sêrtê anîn herêmê ve tên birîn. Qirkirina daran a li herêmê zêdetirî hefteyeke didome. 
 
Hefteyek berê jî li devera Çemê Tehlo yê li Herêma Bestayê gelek darên sedsalî ji hêla cerdevanên Hosyanê ve hatibûn birîn. 
 
MA / Emrullah Acar