
Li Amedê bi hezaran kes li dijî qeyûman meşiyan 

2024-11-04 16:07:15


	AMED -Li Amedê bi hezaran kes li dijî tayînkirina qeyûman meş li dar xistin û desthilatdariya AKP-MHP’ê protesto kirin. Di daxuyaniyê de hat destnîşankirin ku wê kurd nebin kurdên desthilatdariyê û wê rejîma qeyûman qebûl nekin.&nbsp;

	
		Rêxistinên DEM Partî û DBP’ê yên Amedê bi armanca şermezarkirina qeyûmên tayînî ser şaredariyên Mêrdîn, Êlihê û Xelfetiyê hatin kirin, meş li dar xist û daxuyanî dan. Parlementerên DEM Partiyê, hevşaredarên navçeyên Amedê, ji ciwanan bigire heta kal û pîran bi hezaran kes li ser banga DEM Partiyê li ber AZC Plaza Semta Ofîsê kom bûn û dirûşm berz kirin.&nbsp;
	
		&nbsp;
	
		Tevî hemû astengiya polîsan jî meş hat lidarxistin. Piştre bi hezaran kes ji Ofîsê heta Qada Şêx Seîd (Deriyê Çiyê) li pişt pankarta “Kes nikare îradeya gel desteser bike, em ê rê nedin qeyûman” meşiyan û qeyûman protesto kirin. Girseyê bi navber dirûşmên li dijî qeyûm berz kirin. Li ser rêgeha meşê welatiyan bi çepikan û şofêran bi kornayên wesayîtên xwe piştgirî dan meşê.&nbsp;
	
		&nbsp;
	
		‘EWILÎ LI SER ÇARESERIYÊ DIAXIVIN PAŞÊ PLANAN DIKIN’&nbsp;
	
		&nbsp;
	
		Meşa girseyî li Qada Şêx Seîd bi dawî bû û daxuyanî li vir hat dayîn. Ewilî Hevserokê Rêxistina DEM Partiya Amedê Abbas Şahîn daxuyanî da. Şahîn wiha got: “Yên ku di neçareserkirinê de israr dikin, ewilî qala çareserkirina pirsgirêka kurd dikin û li pişt perdeyê jî li dijî têkbirina destekftiyên gelê kurd planan dikin. Ev siyaseta riziyayî, darbekar û qeyûmker tenê ne li ser gelê kurd li ser tevahiya gelên Tirkiyeyê qeyûman ferz dike. Demildest dest ji vê polîtîkaya xwe berdin. Em ê qet dest ji îradeya xwe bernedin. Rejîma qeyûm darbeya siyasî ye. Em qeyûman qebûl nakin.”
	
		&nbsp;
	
		‘EM Ê NEBIN KURDÊN WE’
	
		&nbsp;
	
		Berdevka Meclisa Jinan a DEM Partiyê Halîde Turkoglû jî axivî û wiha got: “Ji xeynî berxwedanê tu çareyemek din nîn e. Em ê li ber xwe bidin. Ev 8 sal in me serê xwe li ber we netewand û em ê qet netewînin. Em ê di her şert û mercan de xwedî li îradeya xwe derkevin. Em ê nebin kurdên we yên ‘maqûl’. Dixwazin bi rêya qeyûman siyasetê dîzayn bikin. Em ê ji we û qeyûmên we netersin, yê me berxwedana para me û xebata me ye. Em ê zihniyet û siyaseta qeyûm têk bibin.”&nbsp;
	
		&nbsp;
	
		Piştî daxuyaniyê, girseyê deh deqîqe çalakiya rûniştinê li dar xist û dirûşm berz kirin. Bang li gel hat kirin ku her roj li her cihî li dijî qeyûman rabin û li qadan bin.&nbsp;
	
		&nbsp;


	&nbsp;