Xizmên girtiyan: Pirsgirêk li ser maseyê çareser dibe

2025-01-22 09:23:36


	 

	ŞIRNEX - Xizmên girtiyan gengeşeyên "çareseriyê" yên piştî hevdîtina bi Rêberê PKK'ê Abdullah Ocalan re dest pê kirin nirxandin û gotin: "Divê li dor maseyê rûnin û behsa aştiyê bikin."

	 

	Deklarasyona ji 7 xalan pêkhatî ya Rêberê PKK'ê Abdullah Ocalan ku piştî hevdîtinê hat parvekirin, di raya giştî de tê gengeşekirin. Abdullah Ocalan di peyama xwe de destnîşan kir ku ew ji bo çareseriyê amade ye û bang li hemû derdoran kir ku bi berpirsiyarî rabin. 

	 

	‘EM JI BO HER KESÎ AŞTIYÊ DIXWAZIN'

	 

	Dayika Osman Baytur ê li Girtîgeha Girtî ya Tîpa T ya Nîzîpê ya Dîlokê girtî ye Hatîce Beyturê got: "Em ji girtin û qetlîaman re dibêjin êdî bes e. Pêwîst e her kes di warê aştiyê de li hev bike. Pêwîst e birêz Abdullah Ocalan li Meclesê be û aştî û wekheviyê temsîl bike. Tenê em naxwazin kurd bên qetilkirin. Divê li ser maseyê rûnên û behsa aştiyê bikin. Divê aştî were û hemû girtiyên siyasî yên li girtîgehan serbest bên berdan. Em êdî naxwazin ji girtîgehan tabût derkevin. Em ne tenê ji bo xwe ji bo her kesî dibêjin aştî."

	 

	'WÊ PIRSGIRÊK LI SER MASEYÊ BÊ ÇARESERKIRIN'

	 

	Dayika Fîkret Erden ê li Girtîgeha Ewlehiya Bilind a Tîpa F a Kirikkaleyê girtî ye Sîdîka Erdenê jî diyar kir ku gelê kurd tevî zilm û zordariya desthilatê hîn jî dest ji banga çareseriyê bernadeye û got: “Em wekheviyê û jiyaneke azad dixwazin. Birêz Abdullah Ocalan jî divê azadiya xwe ya fizîkî ji nû ve bi dest bixe. Lê belê em azadiya zarokên xwe yên dîl dixwazin. Girtiyên nexweş ên dibin nexweşxaneyê hê jî bi kelepçe tên muayenekirin. Tu eleqeya vê bi edaletê re nîne. Dîsa êrişên li dijî Rojava dewam dikin. Rojava welatekî cuda ye, Tirkiye li wir çi dike? Ew erd axa yên ku li wir dijîn bi xwe ye. Ev ne pirsgirêkeke ku bi mirinê çareser bibe. Ji ber vê yekê nikarin kurdan biqedînin. Divê êdî cîhan vê yekê bibîne û çareyekê ji vê pirsgirêkê re bibîne. Kurê min 5 sal in di girtîgehê de ye û 107 sal cezayê girtîgehê lê hatiye birîn. Em wekî dayikên girtiyan dibêjin aştî."

	 

	‘EM AŞTIYÊ DIXWAZIN'

	 

	Dayika Celalettîn Demîr ê li Girtîgeha Girtî ya Tîpa T ya Xarpêtê girtî Şîrîn Demîrê diyar kir ku ji bo aştiyê dê têkoşîna xwe bidomînin û got: “Em ji hevdîtinên bi birêz Abdullah Ocalan re kêfxweş in. Hêvîdar im ku ev danûstandin bibin cihê aştî û aramiyê. Kurê min bi cezayê muebedê û 54 sal cezayê girtîgehê tê darizandin. Ez dayika aştiyê me û li ser navê dayikên aştiyê bang li hemû cîhanê dikim; rabin û daxwaza aştiyê bikin. Em dixwazin girtiyên siyasî bên berdan. Em aştiyê dixwazin, ne zilm û mirinê."

	 

	Xwişka Sînan Yaşar ê li Girtîgeha Tîpa T a Aksarayê girtî ye Sîbel Yaşarê diyar kir ku hevdîtinên bi Rêberê PKK'ê Abdullah Ocalan re di wan de hêviyek çêkiriye û got: “Em dixwazin girtiyên siyasî demildest bên berdan. Em bi hêvî ne. Lê em dixwazin hemû girtiyên siyasî demildest bên berdan. Ji aliyekî ve muzakere tên kirin û li aliyê din jî polîtîkayên qeyûman didomin, ev me nerehet dike."

	 

	‘DIVÊ ŞER RAWESTE'

	 

	Birayê Salîh Gun ê li Girtîgeha Ewlehiya Bilind a Hejmar 2 a Sîncanê ya Enqereyê girtiye Gungîn Gun diyar kir ku gelê kurd bi salan e li dijî zilm û zordariyê têdikoşe û got: “Tu hêviyên min ji dewletê nîne. Hêvîkirina ji dewletê xwexapandin e. Lê êdî kes nikare kurdan bixapîne. Helbet em ji hevdîtinan kêfxweş in, lê nabe ku em ji dewletê bi giştî tiştekî hêvî bikin. Me tu carî zilm û heqaret qebûl nekiriye û em ê qebûl nekin. Em dixwazin girtiyên siyasî bên berdan. Birayê min cezayê muebedê yê giran xwar û ev 33 sal in girtî ye. Em aştî û aramiyê dixwazin. Pêwîst e êdî ev şer raweste."

	 

	MA / Omer Erdogan