NAVENDA NÛÇEYAN - Li gelek navendan pîrozbahiyên Newrozê bi tevlibûna hezaran kesan dest pê kirin.
Pîrozbahiya Cejna Newrozê li gelek navendan didomin. Di serî de herêma Serhedê, li 14 navendan agirê Newrozê hate vêxistin.
AGIRÎ/PANOS
Pîrozbahiya Newrozê ya navçeya Panos a Agiriyê li rex Navenda Çandê hate lidarxistin. Qada pîrozbahiyê bi flamayên DEM Partiyê hate xemilandin. Şêniyên navçeyê tevî barîna baran û berfê jî herikîn qadê û govenda Newrozê gerandin. Tevlibûneke xurt a ciwanan hebû. Pîrozbahî bi deqeyek rêzgirtinê dest pê kir. Di pîrozbahiyê de gelek caran dirûşma “Bijî berxwedana zindanan" hate berzkirin û pîrozbahî bi axaftinan dom kir.
Namzeta hevşaredariyê ya DEM Partiyê ya Panosê Rojbîn Kartal di pîrobahiyê de wiha got: “Em neferên têkoşîna Kawayên şoreşger a li dijî Dehaqan e. Em li dijî xiyanetê mîna Rahşanan, mîna Semayan bedena xwe dikin mertal. Bi vê îrade û azweriyê em amade ne ku xizmetê ji gelê xwe re bikin. Em baş bi pirsgirêkên Panosê û çareseriyên wê dizanin.”
Namzetê din ê hevşaredariyê Kerem Kirtay jî wiha got: “Dem dema azadiyê ye. Em bi hev re bimeşin. Gelo hûn amade ne ku em Panosê bi hev re birêve bibin? Em hewl bidin layiqî we bibin.”
Aktîvîsta TJA’yê Helen Işik jî bal kişand ser grevênb birçîbûnê yên li girtîgehan û ev tişt anî ziman: “Ew îradeya me ne. Îradeya gelê kurd nas nakğin. Em neviyên Şêx Seîd in. Em ê tu caran ji têkoşîna xwe paşvegavê neavêjin.”
MÛŞ/MILAZGIR
Navnîşana pîrozbahiya Newrozê ya navçeya Milazgir a Mûşê jî Qada Qesaban bû. Tevî şert û mercên nebaş ên hewayî jî pîrozbahî bi tevlibûna hezaran kesan hat lidarxistin. Serokwekîlê Koma DEM Partiyê Sezaî Temellî jî tev li pîrozbahiyê bû. Pîrozbahî piştî deqeyek rêzgirtinê dest pê kir. Di pîrozbahiyê de pankartên “Bi rihê Rewşanan Newroz Pîroz be” û “Newroza me biqudret e” hatin vekirin. Zarok û jin bi cil û bergên kurdî ketin qada pîrozbahiyê. Welatiyan heta demekî dirêj govend gerandin û gelek caran dirûşmên “Bijî berxwedana zindanan" û "Bijî Serok Apo" berz kirin.
Hevserokê DEM Partiyê yê navçeyê Kemal Ozel di pîrozbahiyê de spasiya gel kir ku tevî hewayê nebaş jî hatine qadê. Hevserokê DEM Partiyê yê Bajar Yafes Dînar jî got ku Newroz roja azadî û berxwedanê ye û Newroza her kesî pîroz kir.
Namzeta hevşaredariyê ya DEM Partiyê ya Milazgirê Gulistan Ozel jî wiha got: “Newroz, roja berxwedan û azadiyê ye. Em ê berxwedana xwe ya 31’ê Adarê bi coşa Newrozê mezintir bikni. Bi ruhê Kawayê şoreşger em ê di 31’ê Adarê de tiştên aydê xwe dîsa bistînin. Rojên azad ên ku jin, ciwan û gelê me bijîn nêz in.”
Namzetê din ê hevşaredariyê Ahmet Kenan Turker jî wiha got: “Em di pêvajoyeke dîrokî de Newroza xwe bi coş û kelecaneke mezin pîroz dikin. Bila Newroz bibe wesîleya aştî, azadî û çareserkirina pirsgirêka kurd bi rêyên demokratîk.”
KOP
Pîrozbahiya Newroza navçeya Kopê ya Mûşê jî bi tevlibûna sedan welatiyan hat pîrozkirin. Pîrozbahî li rex Termînala Kopê hat lidarxistin û qad bi flamayên DEM Partiyê hat xemilandin. Xelkê navçeyê ji saetên zû yên serê sibehê ve berê xwe dan qada Newrozê.
Bi taybet jî tevlibûneke zêde ya jin û ciwanan hebû û welatiyan li ber stranên kurdî xelekên govendê gerandin. Welatiyên li qadê gelek caran dirûşmên “Bijî Serok Apo”, “Em ê bi berxwedanê bi ser kevin”, “Jin, jiyan, azadî” û “Dê Kurdistan ji faşîzmê re bibe goristan” berz kirin.
Namzetên hevşaredariyê yên DEM Partiyê yên Kopê Aryan Dogan û Arafat Kardagi û Parlamentera DEM Partiyê ya Mûşê Sumeyye Boz jî tev li pîrozbahiyê bûn. Bernameya pîrozbahiyê bi deqeyek rêzgirtinê dest pê kir.
Piştre jî namzeta hevşaredariyê Aryan Dogan wiha bangî gel kir: “Me îro li vir careke din dîrok nivîsand. Bêguman ev dîrok nexşerêya aştî û demokrasiyê ye. We îro ragihandin ku em ê xwedî li vê nexşerêyê derkevin. Bila her kes baş li vê qadê binêre. Em dibêjin ku dem dema serkeftinê ye, dê kesên ziman, dîrok û çanda me qedexe dikin qebûl nekin û di 31’ê Adarê de bersiva pêwîst bidin. Gelê me bi girtin, binçavkirin û tayînkirina qeyûman xelas nabe. Heta ku gelê me li van qadan be hûn dê nekarin bi ser kevin. Hêvîdarim Newroz bibe wesîleya azadiyê.”
‘ÎRO JÎ DEHAQ HENE’
Namzetê heşvaredariyê Arafat Kardagi jî ev tişt anî ziman: “Îro jî Dehaq zarokên kurdan asîmîle dikin, tune dihesibînin. Lê li dijî wan berxwedasnek heye û dê berxwedana me bi ser keve. Li pêşiya me hilbijartinek heye. Ev ne tenê hilbijartina şaredariyê ye. Em qeyûman qebûl nakin û dê wan bişînin. Ev hilbijartin ji bo hevalên me yên girtî û yên li sirgunê ye.”
NIVÎSAN ABDULLAH OCALAN HATE XWENDIN
Parlamentera DEM Partiyê Sumeyye Boz jî piştre çendek beşên nirxandinên Rêberê PKK’ê Abdullah Ocalan ên têkildarî Newrozê xwend. Piştre jî Boz ev tişt anî ziman: “Birêz Ocalan di bin tecrîdeke giran de ye û hevdîtin tên astengkirin. Çima? Ji ber ku dizanin ku gotineke birêz Ocalan dê gelek pirsgirêkên vê îktîdarê afirandine berevajî bike. Lewma ji dengê wî ditirsin. Tecrîd li Îmraliyê dest pê kir lê li tevahiya welêt belav bû. Her wiha li girtîgehan li dijî tecrîdê greva birçîbûnê hatiye destpêkirin. Dayik jî di Nobeta Edaletê de ne. Peyama wan pir zelal e; daxwaza azadiya birêz Ocalan û bidawîkirina zextên li ser girtiyên siyasî dikin. Em jî li vir careke din dibêjin ku ji birêz Abdullah Ocalan re azadî û dawî li zextên ser girtiyan bînin.”
Herî dawî jî Boz anî ziman ku dê di hilbijartinên 31’ê Adarê de bi ser kevin.
Hunermenda Şehrîbana Kurdî piştre derket ser dikê û pîrozbahî bi gerandina govendê bi dawî bû.
QERS/QAXIZMAN
Li navçeya Qaxizman a Qersê bi tevlibûneke zêde ya jinan û ciwanan Cejna Newrozê hate pîrozkirin. Gelek kes bi cilên xwe yên neteweyî tev li pîrozbahiya li navçeyê hate kirin bûn.
Hevberdevka Komîsyona Çand û Ziman a DEM Partiyê Cemîle Tûrhalli bal kişand ser avadaniya demografik a navçeyê û wiha got: “We tu caran di nava gelan de cihekarî nekir. Me ji heman tirarî av vexwar, li ser heman sifreyê xwarin xwar. Ji bo ku ev xwişk û biratiya gelan xera nebe, îro jî em azerî, tirkmen û terekeme bi hev re dijîn. Em ê dîroka xwe radestî nêçîrvanên biyanî nekin.”
Parlamenterê DEM Partiyê Zulkuj Ûçar jî qala girîngiya Newrozê û hilbijartinên herêmî yên 31’ê Adarê kir û wiha got: “Li vê erdnîgariyê gel bi hev re dijîn. Dîsa li vê erdnîgariyê dê gel kudreta xwe di 31’ê Adarê de nîşan bidin. Dê modela bi hev re jiyanê nîşan bidin.”
Ûçar, bal kişand ser çalakiyên greva birçîbûnê yên berdewam dikin û wiha domand: “Hemû gel dixwazin êdî li welatî şer bi dawî bibe. Azadiya fizîkî ya birêz Abdullah Ocalan jî êdî ji aliyê mewzûatên navnetewî ve bûye mecbûrî. Em li ser navê demokrasiyê li ser navê aştiyê, li ser navê edaletê, em ji hevrêyên xwe yên di zindanan de di çalakiya grevê de ne û dayikên me yên li her derê Kurdistanê di nobetê de ne silav dikin.”
Piştî axaftinan hunermenda Navenda Çanda Mezopotamyayê (NÇM) Nûrcan Degîrmencî û Mehmet Serhad derketin ser dikê. Welatiyên li qadê demekî dirêj li ber stranan govend gerandin.
ERZIROM / QERECOBAN
Newroz, li navçeya Qerecoban a Erziromê jî hate pîroz kirin. Ji bo pîrozbahiyan bi sedan kes hatin bahev. Di pîrozbahiyên ku Serokwekîlê Koma DEM Partiyê û parlamenterê Mûşê Sezaî Temellî jî beşdar bû de bi dirûşmeyên hatin berzkirin daxwaza azadiya Rêberê PKK’ê Abdullah Ocalan hate kirin.
Hevserokê DEM Partiyê yê Erziromê Bariş Kemaloglû yê di pîrozbahiya ku bi rêzgirtinê dest pê kir de axivî, wiha got: “Şerê me li dijî tu netew, ol, mezheb û koman nebûye, nabe. Şerê me li dijî bindestiyê, nezaniyê, neheqiyê, paşverûtiyê û her cure zext û metîngeriyê bûye.
‘YEKANE MUXATAB BIRÊZ OCALAN E’
Parlamenter Sezaî Temellî jî di axaftina xwe de wiha got: “Çareserî ew e ku mirov bi muxatabê wê re rûne. Kesê vê gavê biavêje, birêz Ocalan ê rêya sêyemîn vekiriye. Divê ev rê teqez were vekirin. Divê herkes bizane ku yekane muxatabê pirsgirêka kurd birêz Ocalan e.”
Piştî axaftinên hatin kirin, agirê Newrozê hate vêxistin. Girseya li ber stranên Hunermend Denîz Esmer ê derket ser dikê govend gerand, têra dilê Newroz pîroz kir.
SÊRT/DIHÊ
Li Qada Kanî Mergî ya li quntara Çiyayê Çiravê yê navçeya Dihê ya Sêrtê bi dirûşmeya “Rabe dema azadî û serkeftinê ye” Newroz tê pîrozkirin. Gel, qada ku bi alên rengîn ên Partiya Wekhevî Demokrasiyê ya Gelan (DEM Partî) û bi rengên kesk û sor û zer hatiye xemilandin, berî ku Newroz dest pê bike dagirt.
Gelê Dihê li ber muzîkên hatin lêxistin govend gerandin û hêj diherikin qada Newrozê. Parlamentera DEM Partiyê ya Şirnexê Newroz Ûysal dê axaftinekê bike.
BALIKESÎR
Rêxistina Partiya Wekhevî û Demokrasiyê ya Gelan (DEM Partî) a Balikesîrê bi dirûşma “Rabe, dema azadî û serkeftinê ye” li qada Deve Gureşî ya Taxa Bahçelîevler a navçeya Bûrhaniyeyê, bi tevlibûna parlamenterê partiya xwe yê Antalyayê Sarûhan Olûç Newrozê pîroz dike.
Ji her beşa civakê di saetên serê sibê de gel herikî qada Newrozê ya coşeke mezin lê heye. Newroza ku gel bi cil û bergên xwe yên netewî tev li bûn bi tilîliyên jinan û gerandina govendê dest pê kir. Li qada ku Newroz lê hate pîrozkirin pankarta “Rabe, dema azadî û serkeftinê ye” hate daliqandin.
Li Newroza ku alên DEM Partiyê tên hilgirtin de gel peyamê didin ku di hilbijartinên 31’ê Adarê de bayê DEM’ê dê were.
Newroz bi axaftina Serokwekîlê Koma DEM Partiyê û parlamenterê Antalyayê Sarûhan Olûç berdewam dike.
ERDEXAN
Li Erdexanê li ber postexaneya mezin Newroz hat pîrozkirin. Pîrozbahiyên ku gelek kes tevlibûn, bi rêzgirtina ji bo kesên di têkoşîna demokrasî û azadiyê de jiyana xwe ji dest dan hate kirin dest pê kir.
Namzetê hevşaredariyê yê Mêrdînîkê Serkan Yilmaz ê di pîrozbahiyê de axivî, wiha got: “We hewl da bi zindanan me bitirsînin û terkî mirinê bikin. Lê gelê kurd aştî xwest. Em hatin qetilkirin lê me aştî xwest. Niha pêdiviya welat bi aştiyê heye û birêz Ocalan teminata aştiyê ye. Werin em ne operasyonên derveyî sînor, em aştiya mezin biaxivin. Birêz Ocalan û gelê kurd ji aştiyê re amade ye.”
Parlamentera DEM Partiyê ya Îzmîrê Burcugul Çûbuk jî wiha got: “Em dibêjin ‘dem dema azadiyê ye’. Hûn nikarin bikin ku em dest ji vîn, azadî û pêşeroja xwe berdin.”
Çûbûk, nameya ku Rêberê PKK’ê Abdullah Ocalan ji Newroza Amedê ya 2013’an re şandibû xwend.
Pîrozbahî bi stranên ku hunermend Şerzan gotin berdewam kir.