MÊRDÎN - Jinan li Mêrdînê li dijî êrişên ser Bakur û Rojhilatê Sûriyeyê meş li dar xist û wiha gotin: “Em bi qîrînên azadiyê yên jinan ku şevan ronî dikin li vir in û ji vir bi cihekî naçin."
Li dijî êrişên dewleta tirk û koma wê ya paramîlîter SMO’ê yên li ser Bakur û Rojhilatê Sûriyeyê, li navçeya Artûklû ya Mêrdînê bi pêşengtiya Tevgera Jinên Azad (TJA) meş hat lidarxistin. Jinên li Xaçerêya Qoserê ya navçeyê hatin gel hev, pankarta “Bi felsefe ya jin jiyan azadî em ê xwedî li şoreşa jinê ya Rojava derkevin” û dovîzên “Bîjî tekoşîna jinan”, “Li dijî qirkirina jinan jin, jiyan, azadî” hilgirtin. Jinên dest bi meşê kirin, dirûşmên “Jin, jiyan, azadî”, “Bijî berxwedana Tişrînê”, “Rojava dilê me, berxwedan karê me ye” û “Bijî berxwedana Rojava” berz kirin. Girse heta pêşiya avahiya DEM Partiyê ya navçeyê meşiya û li vir daxuyanî da.
‘ROJAVA HÊVIYA AZADIYÊ YE’
Berdevka TJA’yê ya Mêrdînê Hatîce Oncu di daxuyaniyê de got ku êrişên dewleta tirk û SMO’yê yên li ser Rojava her ku diçe dijwartir dibin û qetilkirina rojnameger Cîhan Bîlgîn û Nazim Daştan bi bîr xist. Hatîce Oncu, diyar kir ku rojnameger û sivîl bi SÎHA’yan hedef tên girtin û wiha domand: “Şanoger Bavê Teyar û rêhevala me Menîce Heyder jî di nav de gelek hevalên me hatin qetilkirin. Ev êrişên dermirovî yên li dijî Rojava didomin. Şoreşa Rojava, xweşiktirîn serkeftina têkoşîna gelê Kurd a li dijî mêtingeriyê ye. Hêviya wekhevî û azadiyê ya gelên Rojhilata Navîn e.”
‘EM QÎRÎNA AZADIYÊ YA JINAN E’
Bi domdarî Hatîce Öncû destnîşan kir ku yek ji berxwedanên herî bi rûmet ên mirovahiyê di pêşengiya tevgera jinên Rojava de li dijî DAIŞ'ê pêk hat û bal kişand ser felsefeya "Jin, jiyan, azadî." Hatîce Oncu, wiha domand: “Ji ber vê yekê bi saya hevalên me yên ku di ber wê de şehîd bûne, mîna îdeolojiya ku bingeha xwe jê digire, têk naçe. Weke jin em ê axa xwe û her parçeyê Kurdistanê ku li dijî çanda destavêtinê şoreşa jinê bi ser ket, heta dawiyê biparêzin. Em hêz û moralê xwe ji dayikên ku di çalakiya nobeda 8’ê Çileyê ya li Bendava Tişrînê de ji bo parastina şoreşê li dijî êrişên hovane yên dewleta Tirk û çeteyên wê yên cîhadî bedenên xwe kirin mertal û bi qîrîna dirûşmên ‘Em qet natirsin’ digirin. Em ji faşîstên ku bedena jinê weke qada şer dibînin û difikirin ku wê bi hişmendiya zilamê dagirker tevgera azadiyê bitepisînin radigihînin; Em bi qîrîna azadiyê ya jinan a ku şevan ronî dike li vir in û em naçin tu cihî.”
‘WERIN EM DAWÎ LI REJÎMÊN QIRKER BÎNIN’
Hatîce Oncu destnîşan kir ku zîhniyeta ku di êrişên li ser Kobanê de piştgirî da DAIŞ'ê, niha ji aliyê SMO'yê ve êrişên li ser Kobanê û Bakur û Rojhilatê Sûriyeyê pêk tîne û wiha dirêjî da axaftina xwe: “Li Rojava têkoşîna edalet, wekhevî, demokrasî û aştiyê mezin dibe. Ev têkoşîneke ku heta roja îro bi berdêl hatiye dayîn e. Modela ku ji sala 2014’an û vir ve li Rojava hate afirandin, ji bo gelan û jinên cîhanê bû hêviyek. Modela jiyana azad û wekhev a di tarîtiya Rojhilata Navîn de wê li Rojava bê avakirin. Jin wê bihar, statu û nasnameya xwe ji Rojava re bîne. Şoreşa Jinê ya Rojava ku hêviyên jinên cîhanê pêk tîne, li cihê ku em lê dijîn wê xeta me bidome. Bi ruhê felsefeya xwe ya 'Jin jiyan azadî' em jiyana wekhev a azadiya jinê û jiyana wekhev û azad a gelên ku Rojava mezin kiriye pêşkêşî cîhanê dikin. Em bang li hemû cîhanê dikin; wer in em di vê sedsalê de dawî li rejîmên qirker û înkarker ên ku ji aliyê hêzên kapîtalîst û emperyalîst ve tên pêşkêşkirin, bînin. Bila sedsala 21’emîn bibe sedsala jinan, sedsala gelan û bibe sedsala ku hemû bawerî û nasnameyên cuda bi hev re bijîn."
‘MIFTEYA ŞOREŞA ROJAVA BERXWEDANA TIŞRÎNÊ YE’
Piştre Parlamentera DEM Partiyê ya Mêrdînê Bêrîtan Guneş Altin axivî û berxwedana li bendava Tişrînê silav kir. Bêrîtan Guneş Altin, diyar kir ku ew li gel berxwedanê ne û axaftina xwe wiha qedand: “Mifteya Şoreşa Rojava berxwedana Tişrînê ye. Ji ber vê yekê gelê me yê birûmet 16 roj in li bendava Tişrînê nobetê digirin. Gelê me yê li wir daxwaza azadiyê dike. Lê belê bersiva vê dîlana azadiyê bi êrîşan tê dayîn. Kedkarên çapemeniya azad ji bo heqîqetê diqîrên tê qetilkirin. Hunermendên me tên qetilkirin. Bi vê wesîleyê em di şexsê Menîce Haco û Bavê Teyar de berxwedana Tişrînê silav dikin. Em ê şoreşa Rojava ya di pêşengiya jinê de hatiye avakirin radestî mêran nekin."
Daxuyanî, bi berzkirina dirûşman bi dawî bû.