AMED - Platforma Ked û Demokrasiyê ya Amedê dê piştgiriya xwe ya bi banga dîrokî ya Rêberê Gelê Kurd Abdullah Ocalan re di 9’ê Adarê bi çalakiyeke girseyî ragihîne.  

 

Banga dîrokî ya “Aştî û Civaka Demokratîk” a Rêberê Gelê Kurd Abdullah Ocalan ku di 27’ê Sibatê de hate ragihandin, li hemû cîhanê deng veda û gelek derdor piştgiriya xwe radigihînin. Platforma Ked û Demokrasiyê ya Amedê jî dê di 9’ê Adarê saet di 13.30’ê de li Qada Şêx Seîd daxuyaniyekê bide û piştgiriya xwe ya bi bangê re ragihîne. Daxuyanî dê bi sernavê “Em Piştgiriyê Didin Banga Aştî û Civaka Demokratîk” be. 

 

Berdevkê Demê yê Platforma Ked û Demokrasiyê ya Amedê Mehmet Oktay diyar kir ku weke rêxistinên girseyî yên demokratîk ew piştgiriyê didin banga Abdullah Ocalan û ev tişt anî ziman: “Bi daxuyaniyê re em ê ragihînin ku dê di vê pêvajoyê de tişta dikeve ser milê me pêk bînin. Ji bo ku di avakirina aştiya civakî de para me jî hebe, em ê xwe ji berpirsyartiyê nedin paş. Di 9’ê Adarê de em ê dxuyaniyê bidin û banga tevlibûnê li tevahiya gelê Amedê û rêxistinên girseyî yên demokratîk dikin.” 

 

Oktay, destnîşan kir ku banga Abdullah Ocalan erênî û biqîmet dibînin û got ku divê hemû derdor xwedî li vê bangê derkevin.