Banga dîrokî ya “Aştî û Civaka Demokratîk” a Rêberê Gelê Kurd Abdullah Ocalan di 27'ê Sibatê de bi raya giştî re hate parvekirin. Banga Ocalan hêj niha jî yek rojevên sereke ye. Piştî bangê, PKK’ê bi daxuyaniyekê agirbest ragihand. Piştî bangê, çavê her kesî li ser gavên ku dê dewlet biavêje ye. Lêbelê heta niha ji aliyê dewletê ve tu gav nehatine avêtin. 

 

Piştgiriya ji bo banga dîrokî ya ‘Aştî û Civaka Demokratîk’ her ku diçe zêdetir dibe. Hevseroka Meclisa Rêveberiya Xweseriya Demokratîk a Şengalê (MXDŞ) Cîhan Celo der barê banga Abdullah Ocalan a dîrokî de ji Ajansa Mezopotamya (MA) re axivî. 

 

'EM PIŞTGIRIYA BANGÊ DIKIN Û JI XWE RE DIKIN XALA ESASÎ' 

 

Cîhan Celo, diyar kir ku ji bo ku hemû gelên Rojhilata Navîn bikarin bi hev re bijîn divê ku piştgiriyê bidin vê banga dîrokî û got: “Di 27'ê sibatê de Rêber Apo peyam da û bangawaziyek kir. Ev peyama ku hatiye dayin ji bo tevahiya gelên dinyayê yên bindest bi wate û dîrokî bû û gaveke nû bû. Rêber Apo îlan kir ku bi rêya aştî û civaka demokratîk gelê Kurd ê bikare ji aliyê hiqûqî û siyasî ve hem li Tirkiyeyê hem li Sûriyeyê û hem jî li Îranê mafê xwe bi dest bixe. Ji ber ku her çar dewlet jî gelê Kurd weke gelê xwe û hemwelatiyên we nabînin. Ji ber wê jî ev pêvajoya ku Rêber Apo daye destpêkirin pêngaveke nû ye û ji bo mafê gelê Kurd e. Ji ber wê jî em jî weke civaka Êzidî bi aştî û hezkirinê re ne, dijî şer û êrişan e. Pêvajoya ku Rêber Apo daye destpêkirin em jî hembêz dikin. Weke civak raste em rastî êrişan û fermanan hatine lêbelê me her tim aştî û aramiya civakên din dixwazin. Ji ber wê ev pêngav ji bo me esase. Fikrê Rêber Apo em ji fermanê xelas kirin û niha jî pêngava ku Rêber Apo avêtiye em jî dê piştgiriya wê bikin û ji bo xwe bikin esas.” 

 

'TU KESÎ WEKE RÊBER APO CIVAKA ME NEPARAST'

 

Cîhan Celo, bi lêv kir ku li Şengalê herî zêde jin xwedî li vê bangê derketin û wiha got: “Ji bo ku em bi xwe xwe bi rêve bibin pêwîste Rêveberiya Xweser misoger bikin û ev pêngava ku Rêber Apo nû daye destpêkirin em ji xwe re bikin esas. Ev pêngav li dinyayê bi coşeke mezin hate pêşwazîkirin. Peyama Rêber Apo taybet ji bo jinan pir girîng bû, jinên Êzidî ev peyama ji bo xwe esas girt. Azadiya jin dê fikrê neteweya demokratîk kiriye esas û jinên Êzidî jî dê li ser vê bimeşin. Heta ku azadiya fîzîkî ya Rêber Apo misoger nebe em ê di nava têkoşîn û berxwedanê de bin. Her tim jinên Êzidî dibêjin,'azadiya Rêber Apo azadiya me ye.' Ji ber ku ti kesî weke Rêber Apo ev civake neparastiye. Cara yekeme ku di dîroka Êzdatiyê de ji jinên Êzidî hêzeke leşkerî tê avakirin. Cara ewile ku jin ji aliyê siyasî de, dîplomasî de di nav xebatan de cihê xwe digirin. Piştî ku fikrê Rêber Apo li Şengalê hatî naskirin û jinên Êzidî fikrê Rêber Apo naskirin nema xwe kêmî meran dibinin û bindestiyê qebûl dikin. Ji ber wê em li vir dibînin ku yê ku li vir pêşengtî dikin jinên Êzidî ne. Dixwestin di şexsê jinên Êzidî de civaka Êzidî tune bikin lê jinên Êzidî rê pêşiya fermanan girtin." 

 

PERGALA NETEWEYA DEMOKRATÎK

 

Cîhan Celo, anî ziman ku li Şengalê pergala Neteweya Demokratîk hatiye avakirin û ji ber wê her tim rastî êrişan tê û wiha domand: “Rêveberiya Xweser a ku li Şengalê hatiya avakirin bi ser fikrê Neteweya Demokratîk hatiye avakirin. Di bin sîwana Rêberiya Xweser de herkes dikare ku xwe îfade bike û xwedî li civaka xwe derbikeve. Ji ber wê niha li Şengalê pêkhatiyên din jî cihê xwe digirin û jin tê de esas in. Ew pêngava ku 27'ê Sibatê hatiye avêtin em ê ji xwe bikin esas û em ê li Şengalê bi civakên din re û herkesê ku dixwaze ku mafê xwe yê rewa pêk bîne dê Şengal jê re bibe mînak. Êrişên ku li ser Şengalê tên kirin jî Rêveberiya Xweser dibe bersiv û êrişên ku li ser vê derê tên kirin jî li dijî fikir û felsefeya Rêber Apo ye. Heke ku vê civakê fikir û felsefeya Rêber Apo ji xwe re esas negirtiba îro evqas êriş nedibûn."

 

'DIVÊ TIRKMEN, ÇERKES Û ÊZIDÎ XWEDÎ LI VÊ BANGÊ DERBIKEVIN'

 

Cîhan Celo, di berdewamê de got ku bi saya fikir û felsefeya Abdullah Ocalan li Şengalê guhertinên mezin çêbûn û ev tişt got: “Rêber Apo di paraznameyên xwe de dibêje, ‘Civaka Êzidî yan dê xwedî li çand û baweriya xwe derbikeve û yan jî dê rastî qirkirin û fermanên din jî bên.' Ji ber wê jî peyam û banga Rêber Apo bi taybet ji me re şandiye em ê pêk bînin û xwedî lê derbikevin. Peyama Rêber Apo jî ew bû ku civaka Êzidî xwe ji nû ve birêxistin bike. Tiştê ku Rêber Apo gotibû vê civakê destpêkiri bû. Lê pêwistiya wê bi kûrkirin û berfirehkirinê heye. Ev 26 sal zêdetirin ku tecrîdek li ser Rêber Apo heye û ji ber wê jî niha rewşa civaka Êzidî ya li vir baş nizane. Lê di nava civaka Êzidî guhertinên mezin çêbûn. Me weke jinên Êzidî berpirsyaritî dît ku pêşengî bikin û me weke erk dît ku xwedî li vê civakê derbikevin. Ji aliyê jinên Êzidî ve gavên mezin hatin avêtin.  Jinên Êzidî xwe berpirsyar dibîne ku vê peyamê pêk bînin. Îro jinên Êzidî dikarin her derê dengê xwe bilind bikin û heqê xwe biparêzin. Ji ber wê jî divê ku pêngava Rêbertî em berfirehtir bikin. Ji bo pêkanîna civakeke demokratîk gavên mezintir ji me re pêwîste. Divê ku Tirkmen, Çerkes, Êzidî û her civakeke ku li Iraqê de dije divê ku xwedî li vê bangê derbikeve.”

 

'RIZGARIYA ME BI AZADIYA OCALAN PÊKAN E’

 

Cîhan Celo, bal kişand li ser qetilkirina Elewiyan û got ku encax bi rê û rêbazên Abdullah Ocalan ev qirkirin dikare bê sekinandin û axaftina xwe wiha qedand: “Şerê Cîhanê yê Sêyemîn ew bû ku kêm neteweyan û baweriyên ku li ser axa Mezopotamya mane tune bikin. Hedefa vî şerî ev e. Lê armanca Rêber Apo ew e ku pêşî li van qirkirinan bigirin û her civakek karibe doza heqê xwe bike. Weke Rêveberiya Xweser mafê me di Şengalê de heye. Ji ber ku di sala 2014'an de ewqas hêzên leşker hebûn nekaribûn Êzidiyan biparêzin lêbelê niha dijmin nikare ser me de bê. Ji ber ku dilê me li ser axa me dişewite. Ev pêngav ji bo her kêm neteweyan rê pêşî li qirkirinê girtine. Me dît li Sûriyeyê civaka Elewî weke sala 2014'an çi hate serê civaka Êzidî wan jî heman tişt jiyîn. Ji aliyê heman kesan ve û heman fikrî rastî qirkirinê hatin. Ji ber wê divê ku pêşî li wê bê girtin. Peymana di navbera HSD'ê û hikûmeta demkî ya Sûriyeyê de hatiye îmzekirin girîng e û divê ku naveroka wê pêk were. Ji bo ku azadiya fîzîkî ya Rêber Apo misoger bikin erk û berpirsyariya civaka Êzidî ji ya herkesî zêdetir e. Rizgariya me û hebûna me bi azadiya Rêber Apo re girêdayî ye. Ji bo azadiya wî çi pêwîst be em ê bikin.”

 

MA / Zeynep Durgut