NAVENDA NÛÇEYAN – Prof. Hans-Lukas Kiser, diyar kir ku Kurdan di 10 salên dawî de îspat kirine ku ew dikarin pêşengiya demokratîkbûnê bikin û projeyeke Kurdên li Lozanê tunebû û got: " Wê demê bi Kurdan re kapasîteya xeyalkirina pêşerojê, nebû. Lê niha ev rewş guheriye "
Ji qada navneteweyî piştgiriya ji bo Pêvajoya Aştî û Civaka Demokratîk dewam dike. Ev pêvajo bi pêşengiya Rêberê Gelê Kurd ku 26 sal in li Girtîgeha Îmraliyê di bin şert û mercên tecrîda giran de tê ragirtin, hate destpêkirin.
Ji profesorên Zanîngeha Zurîhê Hans-Lukas Kieser têkildarî pêvajoya di navbera dewleta Tirk û Tevgera Azadiya Kurd û geşedanên li Rojhilata Navîn, ji ANF’ê re axivî.
Kieser diyar kir ku pêvajo ji bo demokratîkbûna Tirkiyeyê, firsendek mezin e û got, divê ji bo têkoşîna demokratîk israr hebe.
Prof. Kieser anî ziman ku tevgera Kurd ji bo çareseriya demokratîk hemû nêzîkatiyên erênî raber kiriye, lê hîna dewlet di nava teredut û şîzofreniyê de ye.
Kieser ragihand ku piştî êrîşên Hamasê yên 7’ê Cotmehê, li Rojhilata Navîn hevsengî guherî û got, “Piştî şerê Hamas-Îsraîlê û vir ve, geşedanên li herêmê dewam dikin. Bi taybetî bi hilweşîna rejîma Esad re gelek tişt qewimîn. Îhtimalek mezin siberoja herêmê wê demokratîk bibe.
Gelo potansiyela demokratîk li kuderê ye? Bi eşkere ez dikarim bêjim ku, ez vê yekê bi taybetî di Kurdan de dibînim. Dema ez projeyên siyasî û rastiyê yên li Rojhilata Navîn tînim berçav, ez di Kurdan de potansiyelek demokratîk dibînim.”
‘ÊDÎ KURDÊN LI LOZANÊ NÎN IN’
Prof. Kieser destnîşan kir ku bi temamî ferq di navbera Kurdên di dema Peymana Lozanê de û Kurdên roja îro de heye û ev tişt got: “Ez di nava Kurdan de pêşketineke mezin dibînim. Wê demê Kurd bi hêsanî hatibûn parçekirin, ji ber ku li wir ne projeyên siyaseteke demokratîk ne jî neteweyî, nebû. Wê demê bi Kurdan re kapasîteya xeyalkirina siberojê, nebû. Êdî Kurdên li Lozaê nîn in. Lê niha ev rewş guheriye.
Hîna gelek pirsgirêk hene, lê pêşketinên girîng jî hene. Têkildarî hevkariya bi aktorên navneteweyî re, geşedanên mezin hene. Ez dibînim ku Kurd ji bo derbaskirina kêmasiyên berê, pêşketinên mezin bi dest xistine.”