EQNERE - Daxwaza azadiya fîzîkî ya Rêberê PKK’ê Abdullah Ocalan mohra xwe li kongreya Partiya Çepên Kesk da ku navê xwe weke HEDEP’ê guherand.
Partiya Çepên Kesk li Eywana Werzîşê ya Ataturkê ya Enqereyê bi dirûşma “Ji bo azadiyê” 4’emîn Kongreya Mezin a Asayî li dar xist. Di kongreyê navê partiyê weke Partiya Wekhevî û Demokrasiyê ya Gelan (HEDEP) hate guherandin. Li gel nav, her wiha rêziknameya partiyê jî hate guherandin. Daxwaza azadiya fîzîkî ya ji bo Rêberê PKK’ê Abdullah Ocalan mohra xwe li kongreyê da. Bi hezaran kesan destnîşan kirin ku navnîşana çareserkirina pirsgirêka kurd Girava Îmraliyê ye.
‘NA JI TECRÎDÊ RE, AŞTÎ A NIHA’
Bi hezaran kesên eywana kongreyê tije kirin, bal kişandin ser tecrîda girankirî ya li ser Rêberê PKK’ê Abdullah Ocalan û pankarta “Na ji tecrîdê re, aştî a niha” vekirin. Beşdaran xwestin ku tecrîda sîstematîk a li Îmraliyê were rakirin û dawî li polîtîkayên şer bê anîn.
DAXWAZA AZADIYA ABDULLAH OCALAN
Di kongreyê de posterê Rêberê PKK’ê Abdullah Ocalan hate vekirin û eleqeyeke zêde ya ciwanan hebû. Di tevahiya kongreyê de ciwanan bênavber dirûşmên “Bijî Serok Apo” û “Bê Serok jiyan nabe” berz kirin û daxwaza azadiya Abdullah Ocalan kirin.
JI BO ÇARESERIYÊ WEKE NAVNÎŞAN ÎMRALI NÎŞAN DAN
Meral Daniş Beştaş li ser navê Lijneya Dîwanê axaftina destpêkê kir. Dema Beştaş ji berxwedana Îmraliyê re silav şandî, eywan bi yek carê rabû ser pêyan, çepik lê dan û dirûşm berz kir. Hevserokên Giştî yên HEDEP’ê Tulay Hatîmogûllari û Tuncer Bakirhan jî bal kişandin ser azadiya fîzîkî ya Abdullah Ocalan û çareserkirina pirsgirêka kurd a bi rêyên demokratîk. Axaftinên hevserokan gelek caran bi dirûşma “Bijî Serok Apo” hate birîn.
AZADÎ BI ABDULLAH OCALAN PÊKAN E
Di kongreya bicoş de daxwaza azadiya fîzîkî ya Abdullah Ocalan mohra xwe lê da. Her wiha welatiyên 65 salî tev li dirûşma “Bijî Serok Apo” bû. Welatî, got ku dilê wî tije bûye û ev tişt anî ziman: “Her tişt encax ewqas dikare baş bibe.” Bi gotina xwe bal kişand ser rola Abdullah Ocalan. Ciwanekê ku tev li daxwaza welatiyê 65 salî bûyî jî dirûşma “Bijî Serok Apo” berz kir û diyar kir ku azadî, bi rakirina tecrîda li ser Abdullah Ocalan pêkan e.
’EV 50 SAL IN WIHA YE, MEŞA ME DÊ HER BIDOME’
Jineke ji Kurdistanê hatibû ku hemû axaftin û peyamên di kongreyê de pir bi baldarî guhdarî dikir, got ku kongreya ew li bendê pêk hatiye. Dayikeke Aştiyê jî bal kişand ser girîngiya azadiya fîzîkî ya Abdullah Ocalan. Tam di wê navberê de welatiyekî got; “Serok hevalê min e.” Li ser vê yekê dayikê wiha bersiv da: “Serok hevalê me tevan e. Ev 50 sal in wiha ye. Dê meşa me wiha bidome.”