Hevberdevka Komîsyona Hiqûq û Mafên Mirovan a DEM Partiyê Sevda Çelîk Ozbîngol diyar kir ku di nava salê de 3 hezar û 128 DEM Partiyî hatine binçavkirin, ji van 409 jê hatine girtin û di çalakiyan de 173 kes hatine girtin.
Li Amedê têkildarî êrişên ser Bakur û Rojhilatê Sûriyeyê daxuyanî hate dayin û ev bang hate kirin: “Em berxwedanê mezin bikin, xwedî li modêla jiyana demokratîk û azad derkevin.”
Di serdegirtinên malan ên li Wanê de Serokê Konseya Bajar a Şaredariya Bajarê Mezin a Wanê Fîkret Dogan û 2 kesên din hatin binçavkirin.
Hevserokên Giştî yên DEM Partiyê Tulay Hatîmogûllari û Tuncer Bakirhan bi nûnerên dîplomasiyê yên 31 welatan re hatin gel hev. Di hevdîtinê de rola Abdullah Ocalan a di çareseriya pirsgirêka kurd de û mijara tecrîdê hate axaftin.
Hunermend Pinar Aydinlar bi hinceta gotina “Ne Tuncelî, ji bo me Dêrsim e” hate binçavkirin.
Malbat û wasiyê Rêberê PKK’ê Abdullah Ocalan ji bo hevdîtinê serî li Serdozgeriya Komarê ya Bursayê û Midûriyeta Girtîgeha Îmraliyê dan.
Hevserokê PYD’ê Xerîb Hiso diyar kir ku ji bo hevdîtinên li Şamê amadekariyê dikin, hewl didin heyetekê ava bikin û wiha got: “Sedsaleke ku em winda bikin tune. Ger em bibin yek neçar in îradeya me qebûl bikin.”
Fermandariya Giştî ya Hêzên Meclisa Leşkerî ya Minbicê bîlançoya şerê 3 rojan ê li Bendava Tişrînê û Pira Qereqozaqê eşkere kir û got di pevçûnan de 210 endamên komên paramîlîter hatine kuştin.
Hevserokê DEM Partiyê yê Mêrsînê Reşat Aşan û siyasetmedar û parastvanên mafan jî di nav de 5 kes di serdegirtinên malan de hatin binçavkirin.
Ji ber barîna berfa zêde li Wanê rêya 86 gundan û 45 mezrayan hatin girtin.
Fesîh Çelebîoglû ku di şewata 20’ê Hezîranê ya li gundê Tobinî yê navçeya Xana Axparê de 90 sewalên wî miribûn, diyar kir ku alîkariya ji bo malbata wî hatiye şandin ji hêla keyayê gund û kurên wî ve hatine desteserkirin û doz vekir.
PEN a Norwecê der barê îdianameya ku ji bo rojnameger Firat Can Arslan de hatiye amadekirin de raporek amade kir û di raporê de hat gotin ku ev doz hem li dijî hiqûqa navxweyî ya Tirkiyeyê û hem jî li dijî pîvanên hiqûqa navneteweyî ye.
Malbatên kesên di dema qedexeya li Cizîrê de hatin qetilkirin, diyar kirin kul ew ê zilma li wan hatiye kirin tu caran ji bîr nekin û li pey doza xwe bin.
Li gundên Derxust û Cinezur ên gundê Licê yên di salên 1990'î de hatin şewitandin, ji bo petrolê xebatên rê hatin destpêkirin. Şêniyên gundan bertek nîşanî vê yekê didin û li gel vê Baroya Amedê jî amadekariyan dike ku li dijî wêrankirina xwezayê dozê veke.
Nûnerên partiyên siyasî û rêxistinên sivîl diyar kirin ku êrişên li ser Bakur û Rojhilatê Sûriyeyê li hemberî paradîgmaya neteweya demokratîk in û gotin:" "Têkoşîna hevpar a gelên bindest dikare van êrişan rawestîne."