26 sal li ser Komploya Navneteweyî ya li hemberî Rêberê PKK’ê Abdullah Ocalan pêk hatibû derbas bû. Starta komployê di 9’ê Cotmeha 1998’an de ji Sûriyeyê derketina Abdullah Ocalan ve destpê kir û heta 15’ê Sibata 1999’an dewam kir. Piştî ku Abdullah Ocalan anîn Tirkiyeyê ji wê demê heta niha li Îmraliyê tê tecrîdkirin. Abdullah Ocalan di nirxandin û pirtûkên xwe de destnîşan kir ku bi vê komployê ve hiqûqa navneteweyî çawa hatiye binpêkirin. Her wiha Ocalan komployê wek ‘Operasyona NATO-Gladio’ pênase dike û wek gava ewil a li hemberî Rojhilata Navîn dinirxîne.

 

Rêberê PKK’ê Abdullah Ocalan di şert û mercên tecrîda giran de ji bo çareseriya pirsgirêka kurd û demokratîkbûna Tirkiyeyê ket nav hewldanên mezin. Abdullah Ocalan di parêznameyên xwe de dibêje ku; ‘Li ser esasê aştî û biratiyê de ez ê xizmetê ji komara demokratîk re bikim’.

 

Ocalan di pêvajoyê de paradîgmaya ‘demokratîk, ekolojîk û azadiya jin’ bi pêşxisti û paradîgma li seranserê cîhanê ji aliyê bi milyonan hat pejirandin. Li gelek deverên cîhanê ji gelek neteweyan jin, rewşenbîr, siyasetmedar û ciwan bi salan e ji bo azadiya fîzîkî ya Abdullah Ocalan dengê xwe bilind dikin. Xeleka dawî ya Kampanyaya Azadiyê ya Navneteweyî di 10’ê Cotmeha 2023’an de hat destpêkirin. 

 

Ji aliyê dostên kurdan bi daxwaza ‘Ji Abdullah Ocalan re azadî , ji bo pirsgirêka Kurd çareseriya siyasî’ li 74 deverên cûda yên cîhanê bi awayekî hevpar û bi tevlêbûna sedan kesan çalakî û bername hatin lidarxistin.

 

Herî dawî Kurd û dostên wan ji ber ku Abdullah Ocalan 26 sal in dîl hatiye girtin, bi tevlêbûna 26 kesan, li 26 navendan ‘Meşa Dirêj’ ku 26 rojan berdewam bike dan destpêkirin. Meş dê di 15’ê Sibatê de li seranserê Ewropayê bi tevlêbûna sed hezaran ve li Strasourgê lidarxistina mîtîngekê ve bi dawî bibe.

 

ÇALAKIYÊN SALA 2024’AN

 

Di meha çile ya sala 2024’an de bi pêşengiya Kongreya Civaka Demokratîk a Ewropayê (KCDK-E) kampanyaya ji Îmraliyê re kartpostal şandinê hat destpêkirin. Starta kampanyayê di 8’ê çileyê de hat dayîn û di çarçoveya kampanyayê de li Swîsre, Almanya, Fransa, Belçîka, Hollanda, Avûstûrya, Îngilistan, Swêd, Norweç û Fînlandayê ji Abdullah Ocalan re bi sed hezaran kartpostal hatin şandin.

 

Di 22’ê çileyê de ji bo balê bikişînin ser dîlgirtina Abdullah Ocalan ya 25 salan bi tevlêbûnên 25 navendan ber bi Strasbourgê meşa dirêj hatin destpêkirin. Meşa ku di 22’ê çileyê de li Parîsê hat destpêkirin di 15’ê sibatê de li Strasbourgê bi dawî bû.

 

Di 27’ê çileyê de li Swîsre, Almanya, Belçîka, Hollanda, Fransa, Yewnanistan, Fînlandiya, Swêd û Norwecê gel daket kolanan û daxwaza azadiya fîzîkî ya Abdullah Ocalan kirin. Li Zanîngeha Sheffield ya Îngilistanê di 29’ê çileyê de têkildarî azadiya Ocalan civînek hat lidarxistin. Li bajarê Stuttgart ya Almanyayê civîneke gel hat lidarxistin. Li Kuleya Eyfelê ya Parîsê pankarta ‘Freedom For Ocalan’ hat daliqandin.

 

PAGANÎ PIŞTGIRÎ DA KAMPANYAYÊ

 

Parlamenterê Kantona Cenewreyê Remy Paganî, di 2’ê sibatê de piştgiriya xwe ya ji bo kampanyayê anî ziman û diyar kir ku di çareseriya pirsgirêka Kurd de muxatap Abdullah Ocalan e. Li bajarên Berlîn û Hambûrg yên Almanyayê bi pêşengiya TekoJIN û TCŞ de di 3 û 4’ê sibatê meş hatin lidarxistin. 

 

Navenda Civaka Demokratîk  a Kurd (NCDK) ya Swêdê, Meclisa Jinan a Amarayê, di 7’ê sibatê de li Stockhlomê û di 8’ê sibatê de li Atînayê, di 11’ê sibatê de li Londonê ji Abdullah Ocalan re kartpostal şandin. Her wiha di çarçoveya ji Îmraliyê re ‘1000 Kartpostal’ de di 10’ê sibatê de li gelek navendan stand hatin vekirin.

 

BI SED HEZARAN KOMPLO ŞERMEZAR KIRIN

 

Bi pêşengiya ciwanên enternasyonalîst de di 11’ê sibatê de li bajarê Basel a Swîsreyê heta bajara Strasbourgê meş hat lidarxistin. Bi heman avayî di 22’ê çileyê de li Fransayê, di 11’ê sibatê de li Baselê, di 9’ê sibatê de li Mannheîmê meş hatin destpêkirin. Me di 15’ê sibatê de li Strasbourgê gihiştin hev. 

 

25’emîn salvegera komployê li banliyoya Villers-le-Bel ya Fransayê bi meşeke girseyî û bi Toulouseyê jî bi mîtîngekê hat şermezarkirin. Di 17’ê sibatê de li bajarê Koln ya Almanyayê bi tevlêbûna sed hezaran komplo bi mîtîngeke dîrokî komplo hat şermezarkirin û azadiya Abdullah Ocalan hat xwestin. 

 

Li Berlînê jinên enternasyonal û Kurd bi boneya 8’ê Adarê ji Abdullah Ocalan re kartpostal şandin. Di çalakiyên 8’ê adarê de ku bi  pêşengiya jinên kurd hatin lidarxistin daxwaza azadiya Ocalan hat ziman. Di 25’ê adarê de li bajarê Zurîh ya Swîsreyê jinan ji Abdullah Ocalan re kartpostal şandin.

 

Di 4’ê nîsanê de li seranserê cîhanê 75’emîn rojbûna Abdullah Ocalan hat pîrozkirin. Di 5’ê nîsanê de li bajarê Berlîna Almanyayê xêzeromana bi navê ‘Dê Azadî Bi Ser Bikeve’ ku jiyana Abdullah Ocalan vedibêje hat danasîn.  

 

ÇALAKIYA ‘HEZAR JIN YEK DENG’

 

Di 6’ê nîsan^ede ji aliyê Tevgera Jinên Kurd a Ewropayê (TJK-E) kampanyaya ‘Hezar jin yek deng’ hat destpêkirin. Ji gelek netew û erdnîgariyên cûda bi hezaran jinan bi vîdeoyan azadiya Abdullah Ocalan daxwaz kirin.

 

Li bajarê Draguignan a Fransayê standa pirtûkên Abdullah Ocalan hat vekirin, bernameya xwendina pirtûkan hat lidarxistin. Her wiha di çarçoveya heman bernmayeyê de 60 pirtûk û 250 broşur hatin belavkirin. Kurd û dostên wan di 15’ê nîsanê de ji bo tecrîd bi  dawî bibe û azadiya fîzîkî pêk were li pêşiya avahiya Konseya Ewropayê ya li Strasbourgê civiyan.

 

20 HEZAR JINAN JI CPT’Ê RE NAME ŞANDIN 

 

Di 19’ê cotmehê de TJK-E diyar kir ku ‘Dê jiyaneke bêyî Rêbertî qebûl nekin’ û li hemberî tecrîdê ji CPT’ê re name şandin. Hat ragihandin ku di çarçoveya kampanyayê de 20 hezar jinan ji CPT’ê re name şandine. Li gelek bajarên Swîsreyê di navbera 19 û 21’ê nîsanê de bi navê ‘Jin û Rêbertî’ atolye hatin lidarxistin û di atolyeyan de têkoşîna Abdullah Ocalan a ji bo jinan û guhertinên ku di encama têkoşînê de pêk hatine hat vegotin. Jin di 15’ê gulanê de li bajarê Strasbourg a Fransayê hatin gel hev û bang li Konseya Ewropayê û CPT’ê kirin.

 

PARLAMENTER Û SENATORAN BANG LI CPT’Ê KIRIN

 

Di 29’ê gulanê de parlamenter û senatorên Tifaqa Çepgir û Kesk yên Îtalyayê têkildarî tecrîdkirina Abdullah Ocalan ji serokê CPT’ê Dr. Alan Mitchell re nameyek şandin û xwestin demildest heyetek biçe Îmraliyê. Heman rojê li Swîsreyê siyasetmedar û ji pîşeyên cûda 26 kesan têkildarî tecrîda li Îmraliyê ji serokê CPT’ê re nema şandin û xwestin heyetek biçe Îmraliyê. Li Almanyayê 99 kesên navûdeng di 3’ê hezîranê de ji CTP’ê re name şandin û di nameyê de xwestin heyeket biçe Îmraliyê bi Ocalan re hevdîtinê pêk bîne û derbarê tenduristiya wî de agahî werbigirin.

 

ROJÊN DIYALOGÊ

 

Di navbera 15 û 22’ê hezîranê bi dirûşma; ‘Bi Abdullah Ocalan re rojên diyalogê’ li Fînlandiya, Swêd, Fransa, Almanya, Katalonya, Yewnanistan, Îtalya, Swîsre, Kolombiya, Qibris, Belçîka, Îngilistan, Polonya, Slovenya û Kenyayê pirtûkên Abdullah Ocalan hatin danasîn. Her wiha standên ku derbarê tecrîda li Îmraliyê agahî bidin hatin vekirin, her wiha bi heman armancê konferans, panel, rojên şanoyê, mîtîng û çalakiyên hunerî hatin lidarxistin.

 

JI 69 XELATGIRÊN NOBELÊ BANGEWAZÎ

 

69 nivîskar, rewşenbîr û zanyarên ku xelatên Nobelê wergirtine ji bo serbest berdana Abdullah Ocalan û ji bo pirsgirêka kurd bi  rêyên diyalogê çareser bibe bangewazî kirin. Ciwanên ku endamên Teko-JIN’in di 31’ê tebaxê de li bajarê Lozanê heta avahiya Neteweyên Yekbûyî ya Cenewreyê  meşek lidarxistin. 

 

TJK-E di 2’ê îlonê de ragihand ku dê pêngava navneteweyî bi kampanyaya ‘Tîrêjên Rojê’ ve bigihînin asteke din. Jinên endamên TJK-E’yê di 4’ê îlonê de li ber avahiya NY’ê kom bûn. Jinan di çarçoveya kampanyayê de li gelek navendên Ewropayê çalakî û bername lidarxistin.

 

LI PLAZO DE MAYO’YÊ BERTEK NÎŞANÎ TECRÎDÊ DAN 

 

Di 4’ê cotmehê de li Arjantînê di çalakiya Dayikên Plazo De Mayo de jinan tecrîdkirina Abdullah Ocalan şermezar kirin. Li gelek navendên îngilistan, Belçîka, Yewnanistan, Swêd, Swîsre, Avûstûrya, Almanya, Fransa û Katalonyayê bi girseyî komploya 9’ê Cotmehê hat şermezarkirin.

 

JI SENDÎKAYÊN NAVNETEWEYÎ PIŞTGIRÎ

 

Di 9’ê cotmehê de Konfederasyona Sendîkayan û Konfederasyona Giştî ya Karkeran a Katalonyayê, Yekitiya Sendîkaya Karkeran a Baskê, ragihandin ku piştgiriyê diden kamanyaya ku ji bo azadiya Abdullah Ocalan hatiye destpêkirin. Di 11’ê cotmehê de Kongreya Yekitiya Sendîkayan a Îskoçyayê (STUC) nameyek ji wezîrê Karê Derve David Lammy re şandin. 

 

Di 1’ê mijdarê de li Strasbourgê çalakiyên bêîtîatiya sivîl hatin lidarxistin. Di 13’ê mijdarê de li Amerîkaya Latîn bi pêşengiya gelek sazî, rêxistin û kesên navûdeng ji bo azadiya Abdullah Ocalan kampanya hat destpêkirin.

 

SALA 2025’AN

 

Di 2’ê çileyê de  senator û parlamenterên Baskê ji bo pirsgirêka kurd bi rêbazên aştiyane çareser bibe û azadiya Abdullah Ocalan ji Lijneya Wezîran a Konseya Ewropayê re nameyek şandin.

 

Li bajarê Lorient a Lannesterê bi mebesta azadiya Abdullah Ocalan û çareseriya pirsgirêka kurd bi daxuyaniyekê starta ‘Meşa Dirêj’ ku 26 rojan dewam bike hat dayîn. 

 

66 KESAN JI KOMÎTEYA WEZÎRAN RE NAME ŞANDIN

 

Di 29’ê çileyê de endamên Kampanyaya Peace in Kurdistanê ji bo azadiya Abdullah Ocalan ji serokê Komîteya Wezîran a Konseya Ewropayê Xavier Bettel re nameyek şandin. Ji Îngilistan û ji gelek deverên cûda yên cîhanê bi giştî 66 kesên akademîsyen, parlamenter, hiqûqnas, nivîskar, parazvanên mafên mirovan, dijberên şer, sendîkayî û kamaraya lordan ji bo azadiya fîzîkî ya Abdullah Ocalan civîna Komîteya Wezîran a 17-19’ê îlonê bi bîr xistin. 

 

ÇALAKIYÊN NOBEDÊ DIDOMIN

 

Li aliyê din li ber avahiya Neteweyên Yekbûyî ya li Cenewreya Swîsreyê ji 25’ê çileya 2021’an vir ve û di 25’ê hezîrana 2012’an de li bajara Strasbourga Fransayê ji aliyê saziyên kurdan yên Ewropayê çalakiyên ‘Azadî ji Abdullah Ocalan re’ hatine destpêkirin û çalakî bênavber dewam dikin.

 

SEVER: BI TÊKOŞÎNÊ KOMPLO VALA HAT DERXISTIN

 

Hevserokê  Kongreya Civaka Demokratîk a Ewropayê (CDK-E) Engîn Sever têkildarî çalakî û bernameyên ku di 15’ê sibatê de li Ewropayê bên lidarxistin axivî û wiha got: “Gelê kurd li her derê bi lidarxistina çalakiyên fedayî komplo vala derxist. 26 sal in komplo tê nûkirin. Her tim li hemberî deskeftî , nasname û çanda kurdan êrîş berdewam kirin. Di şexsê Abdullah Ocalan de hêviyên azadiyê yên sedsala 21’emîn hedef hat girtin, xwestin van hêviyan tune bikin. Lê gelê kurd li hemû deverên cîhanê têkoşîna xwe berdewam kirin û komplo vala derxistin.”

 

‘EM BI RUHÊ AZADIYÊ BIHERIKIN STRASBOURGÊ’

 

Seven balkişand ser kampanyaya azadiyê ya navneteweyî û da zanîn ku armanca wan azadiya fîzîkî ya Ocalan e û wiha axivî: “Em ê di 15’ê Sibatê de bi mîtîngekê meşên xwe bi dawî bikin. Dê tenê Kurd beşdarî mîtîngê nebin her wiha ji neteweyên cûda jin, ciwan, saziyên demokratîk, partiyên siyasî û gelek kesên navûdeng beşdarî mîtîngê bibin. Ger pirsgirêka Kurd were çareserkirin muxatap Abdullah Ocalan e. Peyama me ew e ku nikarin di sedsala 21’emîn de dîsa koledarî û tunekirinê li ser Kurdan ferz bikin. Em dixwazin 15’ê Sibatê ji roja reş derkeve û bibe roja azadiyê. Em bang li hemû kesî dikin ku bi ruhê azadiyê biherikin Strasbourgê.”

 

MA / Dîren Yurtsever