NAVENDA NÛÇEYAN - DEM Partiyiyên ku li gelek bajaran xebatên xwe yên hilbijartinê didomînin, banga “Bi hişmendiya ku hûn dikarin vê pergalê biguherînin dengê xwe bikar bînin” kirin.
Partiya Wekhevî û Demokrasiyê ya Gelan (DEM Partî) di çarçoveya xebatên hilbijartinê yên herêmî yên 31’ê adarê de li bajaran xebatên xwe zêde kirin.
ERDEXAN
DEM Partî di çarçoveya xebatên hilbijartinê de serdana esnafên navçeya Mêrdînik a Erdexanê kir. Namzetê hevşaredariya Mêrdînikê Serkan Yilmaz û Hevserokê DEM Partiyê yê Erdexanê Engîn Çelîk û gelek kes tev li serdanê bûn. Partiyiyan di serdanê de pirsgirêkên esnafan guhdar kirin. Namzetê hevşaredariyê Yilmaz anî ziman ku tevî şaredariya Mêrdînîkê di destê AKP’ê de tu xizmetan nake û wiha got: “Dema ku me şaredariyê bi dest xist em ê nîşanî wan bidin bê ka şaredarî çawa tê birêvebirin.”
Herwiha partiyî bangawaziya tevlibûna Newroza sibê ku dê saet 11.00’an li Devera Hopanê were lidarxistin, kirin. Dê hevserokê Giştî yê DEM Partiyê Tuncer Bakirhan jî tev li pîrozbahiyan bibe.
ŞIRNEX
Li navçeya Elkê ya Şirnexê jî bi tevlibûna namzetê hevşaredariyê yê Bajarê Mezin ê Wanê yê DEM Partiyê Abdullah Zeydan, Hevserokê DEM Partiyê yê Şirnexê Abdullah Gungen, namzetên Hevşaredariyê yên Elkê Beybûn Aslan, Egîd Yîgît û rêxistina navçeyê serdana gundên Bîşî, Kespiyaniş, Xortahl, Bêrman û Tivorê kirin. Di serdanê de rûspîyên gundan hatin ziyaret kirin.
‘AŞITÎ BI TIFAQIYA ME PÊKANE YE’
Li gundê Xortahlê di serdanê de namzetê hevşaredariyê yê Bajarê Mezin ê Wanê yê DEM Partiyê Abdullah Zeydan axivî. Zeydan, di axaftina xwe de bal kişand ser tecrîta girankirî ya li ser Rêberê PKK’ê Abdullah Ocalan û grevên birçîbûnê û wiha axivî: “Îro li dijî zilm, zordarî û tecrîta girankirî ya li ser birêz Abdullah Ocalan di girtîgehan de grevên birçîbûne hatine destpêkirin. Tenê daxwaza wan bi dawîkirina vê zilmê ye. Em jî weke gelê kurd divê ku li dijî vê zilmê derbikevin û qebûl nekin. Divê ku em di 31’ê Adarê biçin ser sindoqan û raya xwe bi wîjdanî biavêjin da ku em bikaribin deriyê aşitiyê vekin. Aşitî bi tifaqiya me pêkane ye heke ku em bûn yek dê yek pirsgirêk bê çareserî nemîne. Ji ber wê daxwaza me ji gelê me ew e ku bi hişmendiya ku raya wan dikare vê pergalê biguherîne biavêje.”
Piştî axiftinanan daxwaz û nêrînên rûspiyan hatin guhdar kirin.
SÊRT
Parlementera Partiya Wekhevî û Demokrasiyê ya Gelan (DEM Partî) ya Erziromê û Namzeta Hevşaredariyê ya Bajarê Mezin a Stenbolê Meral Daniş Beştaş li Sêrtê bi Namzetên Hevşaredariyê yên Sêrtê yên partiya xwe Sofya Alagaş û Mehmet Kaysî ve serdana dikandarên li ser Rêya Guresê kir. Beştaş û şandeya pê re bi dilgermî hatin pêşwazîkirin û welatiyan li gel Beştaş û namzetên Sêrtê wêne kişandin. Di şandeyê de rêveberên DEM Partî û Partiya Herêmên Demokratîk (DBP) jî cih girtin.
Beştaş û şandeya pê re li ber deriyê avahiya partiya xwe hatin gel hev û heta buroya xwe Şelaleyê ya li ser Rêya Guresê dikandar silav kirin û pirsa halê wan kirin. Welatiyan Beştaş û şandeya pê re bi çepikan pêşwazî kirin û di hilbijartinê de serkeftin xwestin. Beştaş li ber buroya hilbijartinê ya jinan a partiya xwe bi girseyê re govend gerand û dû re serdananên xwe domandin.
ÎZMÎR
Rêxistina DEM Partiyê ya Îzmîrê di çarçoveya hilbijartinan de li navçeyên Karabaglar û Bornovayê hevdîtinên bi gel re li dar xistin. Beriya hevdîtina li Taxa Lîmontepe ya Karabaglarê gel bi konvoyê li taxê tûrek avêt û hate cihê hevdîtinê. Di hevdîtina ku bi dehan welatî tevlibûn de govend hate gerandin û coşeke mezin hebû.
Namzetê Hevşaredariyê yê Bajarê Mezin ê Îzmîrê yê DEM Partiyê Akin Bîrdal, destnîşan kir ku ji bo çareseriya demokrasî, aştî, edalet, kar û kedê divê pirsgirêka kurd were çareserkirin. Bîrdal, diyar kir ku di vê têkoşînê de deyndarên kesên jiyana xwe ji dest dane ne û wiha got: “Dema em dengê xwe bikartînin divê bi wijdana xwe re rû bi rû bimînin û dengê xwe bidin DEM Partiyê. Dibe ku di vê pêvajoyê de hin kes du dil bin. Lê dengê xwe bidin xwe.”
FERASETA RÊVEBERIYÊ YA PIR ÇANDÎ Û PIR ZIMANÎ
Namzeta Hevşaredariyê ya Bajarê Mezin a Îzmîrê Turkan Aslan Agaç a di hevdîtina li Qada Cûmhûriyet a Bornovayê de axivî jî dê bajaran bi rêgeza pir ziman, bawerî û çandî bi rê ve bibin.
ÇEWLÎG
Rêxistina DEM partiyê ya Çewlîgê, di çarçoveya xebatên hilbijartinê de têkildarî ewlehiya hilbijartinê li avahiya partiyê perwerde li dar xist. Peywîrdarên sindoqan û berpirsyarên dibistanan beşdarî perwerdehiyê bûn. Piştî bernameya perwerdehiyê şandiya ji namzeta hevşaredariyê Çîçek Arîç û rêveberên bajêr pêk dihat, li taxan serdana malan kirin. Di serdanan de têkildarî girîngiya bikaranîna deng û deng dê çawa were bikaranîn agahî hatin dayîn. Welatiyên li vir bi şandeyê re hatin bahev wiha got: “Bila gelê me bibe yek. Dema namzeta me jin be em dikarin pirsgirêkên xwe rehettir çareser bikin. Em mohra xwe di bin gilovera di bin darê de bidin.”
DÎLOK
Rêxistina DEM Partiyê ya Erebanê li navenda navçeyê mitînga hilbijartinê li dar xist. Parlamentera DEM Partiyê ya Stenbolê Çîçek Otlû, namzetên Hevşaredariyê yên Şaredariya Bajarê Mezin ên Dîlokê, Rêxistinên DEM Partiyê yên navend û navçeyê tev li mitîngê bûn. Şandeya ku bi konvoyê hate qada mitîngê bi eleqeyeke zêde ya welatiyan hate pêşwazîkirin.
Namzetê Hevşaredariyê yê Erebanê yê DEM Partiyê Rifat Dagdelen, qala polîtîkayên şaredarê niha kir û wiha got: “Armanca me ne rant e, ji pêşerojê re xizmet e.”
‘EM Ê DI 31’Ê ADARÊ DE BI DENGEKÎ XURT BIBIN BERSIV’
Namzetê Hevşaredariyê yê Bajarê Mezin ê Dîlokê yê DEM Partiyê Selman Tûtûmlû, bertek nîşanî gotinên Serokkomarê AKP’î Erdogan ên yek dewlet, yek milet, yek ol ên li qadan û wiha axivî: “Di îslamiyetê de ji kesên red dikin re dibêjin murtep. Di qûran û îslamiyetê de texrîbatê dikin û bi hezaran mirovan bi vî awayî dixapînin. Em ê di 31’ê adarê de bi awayekî xurt deng bidin van.”
Parlamentera DEM Partiyê ya Stenbolê Çîçek Otlû jî anî ziman ku dê di hilbijartinan de bi feraseteke demokratîk û pirrengî ya şaredariyê werin.
RIHA / PIRSÛS
Li navçeya Pirsûs a Rihayê jî namzetên hevşaredariyê Ayten Kaya û Muslum Baran li taxên navendê û li gundan xebatên hilbijartinê meşandin. Piştî serdanên mal û dikandaran ên li taxa Cumhuriyetê li otogarê bi welatiyan re hate bahev. Namzeta hevşaredariyê Kayayê jî li gundan ji bo partiya xwe piştgirî xwest.
HEWAG
Xebatên DEM Partiyê yên navçeya Hewagê îro li gundan zêde bû. Namzetên hevşaredariyê Aygun Kapikayali û Îsmaîl Yildiz li gel rêveberên DEM Partiyê yên bi wan re li gundên Çatak, Zorova, Teterhoyik û Çogerşiyê xebatên hilbijartinê meşandin. Namzetên ku welatiyan piştgiriya wan kirin, projeyên xwe yên piştî hilbijartinê vegotin.
HALÎLIYE
Yek navçeya ku xebatên gundan lê zêde bûn jî navçeya navendî Halîliye bû. Parlamentera bajarî ya serdema beriya niha Ayşe Surucu jî bi namzetên hevşaredariyê Sema Ateş û Sûphî Yilanci re serdana gundan kir. Surucu û namzet li gundên Uç Konak, Kaynakli, Nalçihan û Aktaşê ji aliyê welatiyan ve bi eleqeyeke zêde hatin pêşwazîkirin. Namzetan li vir pirsgirêkên gel guhdarkirin û projeyên xwe yên çareseriyê vegotin.
BÊRECÛK
Parlamentera DEM Partiyê ya Bajêr Dîlan Kûnt Ayan jî di nav xebatên li navçeya Bêrecûkê de cihê xwe girtin. Xebat weke serdanên gundan û civînên bi gel re hatin kirin. Li gel namzetên hevşaredariyê yên navçeyê Bêrîvan Îlkaya Manaz û Mehmet Begît li gundên Yûkari Încîrlik, Karabaş, Karababa, Boztepe, Sekîlî Bogurtlen û Sogîrlan serdana malan kirin.
KARAKOPRU
Li navçeya navendî Karakopruyê jî xebat ji sê baskan berdewam kir. Namzetên hevşaredariyê Rêzan Ayhan, Ridvan Yavûz, rêveberên DEM Partiyê yên navçeyê û endamên meclisa şaredariyê serdana gundên Lûrik, Canbek, Kayter, Nevargerm, Kulora kirin. Ayhan a li vir pirsgirêkên gel guhdar kir, wiha axivî: “Em ê gelê xwe ji çeteyên ku feraseta talanê keda wan dixwin xelas bikin.”
Koma xebatê ya duyemîn jî bi heman awayî li gundan bi gel re hatin bahev. Di çarçoveya xebatan de serdana gundên Horzim, Çîftlîk, Sancak, Kûşkûcû û Pinarbaşiyê hatin kirin. Koma xebatê ya sêyemîn jî xebatên xwe li herêma Maşûk/Seyrantepeyê kirin. Rêveberên navçeyê û koma xebatê ya dilxwaz buroşurên dest yên di mijara ewlehiya hilbijartinê de hatibûn amadekirin belav kirin.
ŞIRNEX
Rêxistina DEM Partiyê ya Cizîrê li gel namzetên hevşaredariyê û ciwanên enternasyonalîst ên ji Ewropayê hatine li taxên Dîrseklî, Îsaaxa, TOKÎ, Konût û Musiriyê serdana malan kirin.
Namzetên hatin Taxa Dîrsekliyê, ji aliyê şêniyên taxê ve bi çepik û tilîliyan hate pêşwazîkirin. Ligel namzetan li taxê dest bi serdanê kir, şêniyên taxê ji malên xwe derketin û heta taxên Îsaaxa, TOKÎ, Konût û Musiriyê bi namzetan re çûn. Serdana ku kesên di rê de derbas dibûn jî tev li bûn veguherî meşeke girseyî. Girseyê her tim dirûşmeyên “Bê Serok Jiyan Nabe” , “Bijî berxwedana zindanan” , “Em ê bi berxwedanê serbikevin” berzkirin.
Girseya ku bi coşeke mezin hate TOKÎ’yê jinên ku derketin şaneşînên malên xwe bi çepikan ew silav kirin. Di serdanan de bertek nîşanî tecrîda li ser Rêberê PKK’ê Abdullah Ocalan hate dayîn, namzetan pusûle nîşanî gel dan û têkildarî dê çawa deng bikarbînin de gel agahdar kirin. Namzet bi dirûşma “Cizîr bi we serbilind e” ji gund hate oxirkirin.
Li aliyê din li navçeyên Hezex û Silopiya jî xebat tevahiya rojê dom kirin. Hevşaredarên navçeyan di çarçoveya xebatên hilbijartinê de tevahiya rojê serdanên xwe domandin.