Polîsan bi ser avahiya Rêxistina Partiya Wekhevî û Demokrasiyê ya Gelan (DEM Partî) ya Êlihê de girtin. Hat ragihandin ku serdegirtina avahiya partiyê li ser “îxbareke” derheqê Meclisa Ciwanan a DEM Partiyê hatiye kirin. Lê belê derheqê “îxbarê” de tu agahî bi partiyiyan re nehatin parvekirin. 

 

Partiyiyan polîs hişyar kirin û gotin ku beriya parêzer û hevserokên partiyê nikarin li avahî lêgerînê bikin. Li ser vê yekê polîsan jî gotin: “Em lêgerînê dikin û hûn ku derê bixwazin herin li wir giliyê xwe bikin.” Li ser bertekên partiyiyan, polîsan ketin û derketina avahiya partiyê girtin. 

 

DEM Partî ya Êlihê jî ev bang kir: “Faşîzma AKP-MHP’ê ku di hilbijartinan de têk çû, careke din bi êrişa li dijî kurdan û partiya wan hewl dide dawiya xwe taloq bike. Banga me ji bo gelê me ew e ku xwedî li partiya xwe derkeve û ji bo piştevaniyê bên pêşiya avahiya partiyê. Êlih, xwedî li vîna xwe derkeve.”

 

Bi sedan kes hatin pêşiya partiyê û bi dirûşmên “Em ê bi berxwedanê bi ser kevin” û “Zext nikarin me têk bibin” serdegirtina avahiya partiyê protesto kirin. 

 

Gel hêj li pêşiya avahiya partiyê ye û lêgerîna li avahiya partiyê jî didome.