STENBOL - Di çarçoveya lêpirsîna navenda wê Stenbolê de 3 rojnameger hatibûn binçavkirin. DFG û DÎSK Basin-Îş’ê bertek nîşanî binçavkirina rojnamegeran dan û xwestin bên berdan.
Îro di danê sibehê di çarçoveya lêpirsîna navenda wê Stenbolê de bi ser gelek malan de hate girtin. Piştî lêgerînên li malan, rojnameger Elîf Akgul, Yildiz Tar û Ercument Akdenîz jî di nav de 52 kes hatin binçavkirin.
Komeleya Rojnamegeran a Dîcle Firatê (DFG) û DÎSK Basin Îş’ê li ser hesabên xwe yên medyaya dijîtal daxuyanî dan û bertek nîşanî binçavkirina rojnamegeran dan.
‘TÊKOŞÎNA BI RUHÊ PIŞTEVANIYÊ’
DFG’ê di daxuyaniya xwe de got: “Di çarçoveya lêpirsîna navenda wê Stenbolê de siyasetmedar, hunermend û 3 rojnameger jî di nav de gelek kes hatin binçavkirin. Di nava binçavkiriyan de rojnameger Elîf Akgul, Yildiz Tar û Ercument Akdenîz jî hene. Em, binçavkirina hempîşeyên xwe qebûl nakin. Em ê li dijî operasyonên binçavkirinê yên li dijî rojnamegeran ku êdî jirêzê bûne, qebûl nakin. Em bang li hemû rêxistinên pîşeyî dikin ku li dijî van operasyonan bi ruhê piştevaniyê têbikoşin.”
BILA ROJNAMEGER BÊN BERDAN
DÎSK Basin-Îş’ê jî diyar kir ku endama wan a lijneya rêveberiyê ya berê Elîf Akgul û endamên wan Ercument Akdenîz û Yildiz Tar hatine binçavkirin û got: “Em van operasyonên li dijî rojnamegeran qebûl nakin. Divê hevalên me demildest bên berdan.”