76’emîn rojbûna Rêberê Gelê Kurd Abdullah Ocalan ku li Girtîgeha Bi Ewlekariya Bilind a Tîpa F a Îmraliyê di nava şert û mercên tecrîdê de tê ragirtin, li gelek cihan bi taybetî li Kurdistanê bi coş hat pîrozkirin. Navendên ku pîrozbahî hat lidarxistin yek jî jê Wan bû, niştecihên Wanê diyar kirin ku xeyal û daxwaza wan ew e ku bi Abdullah Ocalan re werin cem hev.

 

Welatiyê bi navê Omer Ûçar ev tişt anî ziman: "Xwezî hemû girtî, bi vê pêvajoya ji aliyê Ocalan ve hatiye destpêkirin, di serî de ew bi xwe û hemû girtî azad bibin. Ez hêvî dikim ku di zûtirîn demê de azad bibe û di nav me da be. Tevî ku baweriya me bi dewletê nîne jî, baweriya me bi birêz Ocalan heye. Lê ti baweriya me bi Tirkiyeyê nîne. Em dixwazin Tirkiye di zûtirîn demê de gavan bavêje da ku samîmiyeta xwe nîşan bide."

 

'BILA PÊVAJO BILEZTIR BE'

 

Fazil Canpolan diyar kir ku gel piştgiriyê dide pêngavê û wiha got: "Em bi hemû ruh û bedena xwe li cem Rêber Apo cih digirin. Em dixwazin ku niha tiştên baş biqewimin. Heyeta ku diçe Îmraliyê ji bo destkeftiyên gel bi dest bixe divê gavan bavêje. Ya wê maf û destketiyên vî gelî ji wan re bê dayîn, ya jî wê xwe ji vê venegirin. Em dê têkoşîna xwe ya aştî û demokrasiyê berdewam bikin. Em ti carî serî natewînin. Bila vê pêvajoyê qet dirêj nekin. Divê di zûtirîn demê de lezê bikin û gavên şênber bavêjin. Divê ti alî li dijî vê pêvajoyê dernekeve. Li şûna astengkirinê divê her kes piştgiriyê bide û em bi hev re aştiyê pêk bînin."

 

'KURD AŞTIYÊ DIXWAZIN'

 

Rabîa Algol da zanîn ku pêvajoya ku Abdullah Ocalan daye destpêkirin ne nû ye û wiha got: "Abdullah Ocalan di dema têkoşîn û zindanê de hewl da aştiyê pêk bîne. Tevî ku rayedarên dewletê ev bang qebûl kirin jî, ti gaveke şênber neavêtin. Di ser banga Ocalan re zêdeyî mehek derbas bû. Pêwîste her kes rabe ser piyan û ji bo avakirina aştiyê têbikoşe. Destê ku ji bo aştiyê hatiye dirêjkirin divê li hewa neyê hiştin. Ji Şêx Seîd heta Seyîd Riza û Rêber Apo ev sed sal in em daxwaza aştiyê dikin. Em dixwazin banga aştiyê ya ji aliyê Rêbertiya me ve hatiye kirin di zûtirîn demê de bi encam bibe. Em dixwazin rojbûna Rêbertî bibe roja aştiyê ya cîhanê. Ger Ocalan azad bibe dê cîhan azad bibe. Azadiya Rêbertî wê Kurdan, Tirkan û tevahiya cîhanê azad bike. Em bang li hemû dewletên cîhanê dikin ku pêvajoya ku Birêz Ocalan daye destpêkirin xwedî derkevin û piştgiriyê bidinê.”

 

DAXWAZA JIYANA BI RÛMET

 

Kevê Işik got ku bila rojbûna Abdullah Ocalan ji bo hemû gelên bindest ên cîhanê bibe wesîleya aştiyê û wiha axivî: "Îro rojeke pir girîng û pîroz e. Em ji banga Rêbertiya xwe gelek keyfxweş in. Ji ber ku ev bang ne mirinê, jiyanê hedef digire. Lê mixabin her çiqas Tirkiye vê bangê erênî bibîne û piştgiriyê bide jî gavên şênber naavêje. Sozên xwe bi cih naynin. Divê her kes di vê pêvajoyê de destê xwe deyne ser wijdanê xwe, piştgiriyê bide Rêbertî. Pêwîste her kes ji bo aştiyê rabe ser piyan. Weke Kurd me koçberî, şewitandina gundan, mirin, îşkence, girtin û gelek tiştên din heta vî emrî dît, lê em naxwazin nifşên pêşerojê wan bibînin. Piştî vê demê em jiyaneke bi rûmet dixwazin. Ya herî girîng jî em dixwazin Rêberê Gelê Kurd Ocalan bi awayekî azad di nava xwe de bibînin."

 

XEYALA WAN DÎTINA OCALAN E

 

Xemê Aydin daxwaza azadiya Abdullah Ocalan kir û wiha got: "Heta ku Rêber Apo azad nebe, em Kurd nikarin azad bibin. Kengî Ocalan azad bibe, wê demê Kurd wê azad bibin. Bi salan e em xeyala azadiya Rêbertiya xwe dikin. Tişta ku em dixwazin ew bibînin û li ser maseya aştiyê mil bi mil li gel wî bisekinin. Di vî warî de divê dewlet gavê biavêje. Bi salan e em li benda vê roja dîrokî ne."

 

'BILA DEWLET GAV BIAVÊJE'

 

Hediye Koçak diyar kir ku ji bo Kurdan 4 'ê Nîsanê ne tenê rojbûna Abdullah Ocalan e, di heman demê de rojbûna hemû Kurdan e û wiha got: "Çav û guhê 4 parçeyên Kurdistanê di azadiya Rêbertî de ye. Ez hêvî dikim ku 4 'ê Nîsanê bibe roja ku Rêbertiya me bigihije azadiya xwe ya fizîkî. Aştî ji bo her kesî baş e. Êdî xwîn neyê rijandin û gelên azad bibin."

 

'RÊYA AŞTIYÊ BI AZADIYA FÎZÎKÎ YA OCALAN DIBE'

 

Bahar Abî ji bo azadiya fîzîkî ya Abdullah Ocalan bang kir û wiha got: "Em dixwazin li vî welatî û li Rojhilata Navîn aştî pêk were. Ev yek bi azadiya fîzîkî ya Ocalan mimkun e. Dewlet jî ji bo vê yekê pêwîst e gavan bavêje. Bi pêngava bê avêtin re wê aştî bê tevahiya cîhanê û Tirkiyeyê."

 

MA / Rûken Polat - Mazlûm Engîndenîz