ENQERE – Hevserokên Giştî yên DEM Partiyê Tulay Hatîmogûllari û Tûncer Bakirhan ên ku çûn serdana siyasetmedarên kurd ên li Edîrne û Kandirayê girtî gotin: “Me der barê stratejiyên xwe yên li ser pirsgirêka kurd, grevên birçîbûnê û hilbijartinên xwecihî de danûstendin kir." 

 

Hevserokên Partiya Wekhevî û Demokrasiyê ya Gelan (DEM Partî) Tulay Hatîmogûllari û Tûncer Bakirhan, duh li Girtîhgeha Kandirayê bi Hevseroka berê ya HDP’ê Fîgen Yuksekdag, siyasetmedar Gultan Kişanak, Semra Guzel û Nûrhayat Altûnê re û îro jî li Girtîgeha Edîrneyê bi Hevserokê berê yê HDP'ê Selahattîn Demîrtaş û Hevşaredarê Şaredariya Bajarê Mezin a Amedê yê berê Selçuk Mizrakli re hevdîtin kirin. 

 

Piştî serdanan hevserokan bi nivîskî daxuyaniyek belav kirin. 

 

Di daxuyaniyê de hat diyarkirin ku der barê hilbijartinên xwecihî, meseleya kurd û grevên birçîbûnê yên li girtîgehan didomin de hevdîtin kirine û guh li pêşniyaz û dîtinên siyasetmedarên girtî kirine. 

 

Di daxuyaniyê de wiha hat gotin: "Me der barê stratejiyên xwe yên li ser pirsgirêka kurd, grevên birçîbûnê û hilbijartinên xwecihî de danûstendin kir." 

 

Her wiha di daxuyaniyê de hat gotin ku ji ber mirina bavê wî li ser navê partiyê, gel, pêkhateyên partiyê, saziyên civaka sivîl û hemû dost û hogiran sersaxî xwestine û Demîrtal jî ji ber xwedîderketina li şîna bavê wî malavayiya her kesî kiriye.